Matla-kadi-be (Southern Sotho Edition)

Maikemišetšo a puku: Pukwana ye’, Matla-Kadi-Be e akaretša motswako wa bophelo bya kgopolo le bya nnete nakong ya bophelo bya setšhaba sa batho ba lebaka leo le fetilego. Pukwana ye’, e ithekgile ka ditaodišo tšeo bagolo ba rena ba bego ba re anegela ka tšona ka dinako tša maetišo. Mabose, mathata le matshwenyego ao ba kopanego le wona, ao ba phetšego ka wona a sa swanelwago go lebalwa gobane a re šupetša moo re tšwago gona le seo re lego sona ka lebyale. Bosasa bo agwa godimo ga lehono, bagolo ba rena ba phetše ka nako tša dintwa, tlase ga boetapele le pušo ya magoši, moo monna-nna a bego a êlwa ka maatla le bonatla bya gagwe. Leetong la bophelo bya gagwe Matla-Kadi-Be, lesogana le maatla, leo le belegwego puleng e kgolo e maatla ya matlakadibe, le bontšhitše bonatla, maikemišetšo, bokgwari le botho byoo go bego go le molaleng gore bo be bo theilwe godimo ga thekgo ye kgolo ya Modimo le badimo bao ba bego ba mo etile pele ka dinako tšohle. Ga go makatše ge Matla-Kadi-Be a feleleditše a buša setšhaba, ke ka ge a be a na le madi a bogoši. Pukwana ye’ e ngwadilwe ka Sepedi sa go thelela le go hlweka, ka tšhomišo ya direto tša go hlophiwa ka bokgwari moo e lekago le go tsošološa kganyogo ya go bala go baswa le batho ba bagolo le go oketša dibuka tšeo di lego gona tšeo tše dingwe tša tšona di šetšego di badilwe leboelela. Thobela, Modibana Lazarus Kadi.