Rika du Plessis Omnibus 6 (Afrikaans Edition)

Let asseblief op dat hierdie verhale ook as enkeltitels by Amazon verkoop word.

Na die verbreking van haar verlowing, gaan Inge Kaapstad toe om vir ’n ruk lank haar suster-hulle se dakwoonstel op te pas tydens hulle afwesigheid. In hulle posbus ontdek sy ’n brief wat aan ene Vlindertjie gerig is. Dit kom van ene Oupie wat duidelik ’n geselsmaat soek. Ooglopend het die brief in die verkeerde posbus beland, maar Inge se jammerhart maak dat sy daarop reageer, en sy trap voltreffer in die liefdestrik wat vir haar gestel is.

Dokter Simon raak verlief op Essie, sy plaasvoorman se dogter. Hy bevind hom egter skielik in ‘n ongemaklike situasie toe sy ma en skoonsuster en dié se vriendin dit bewimpel dat hy aan iemand anders verloof is, en dié meisie boonop sê sy verwag sy kind. Hy skop met mag en mening daarteen, want van die nag van passie waarvan die meisie praat, onthou hy absoluut niks.
Die aantrekkingskrag tussen hom en Essie is so sterk dat hulle hulle liggaamshunkerings na mekaar wou versadig, nie bloot uit begeerte nie, maar met liefde gepaard daarmee ten spyte van Simon se bisarre omstandighede.
Dinge neem ‘n drastiese wending aan toe Simon boonop by die waterval teen die berg van sy plaas ‘n vreemde meisie in die skadu’s sien dans.

Paul verbeel hom hy het ’n mens met lang wit hare agter die rotse naby die Kransberge gesien wegkoes. By nadere ondersoek kry hy niks. Daardie aand op sy donker stoep, gewaar hy weer ’n bewegende wit blerts tussen die struike in die donker. Sonder om sy oë van die kol af te neem – wat nou ineens stil bly staan – stap hy met die trappies af om dit nie weer uit die oog te verloor nie. Hy trap ’n trappie mis, val na onder en stamp sy kop. Toe hy bykom, kan hy nie glo wat hy sien nie. Hier by hom op die grond kniel ’n feitlik nakende, langhaar blonde meisie. Sy het net twee stukkies velkledingstukke aan en sy sê haar naam is Njobe.