Kubori Kikiam: Strips for the Soul Omnibus (Filipino)

Babala: Naglalaman ng kalapastangan, kahubuan, at mutant na pagkain.

Halina sa mundo ng Kubori Kikiam! Kilalanin sina Dodon, Benjo, at Manny—mga naglalakad at nagsasalitang pagkaing kalye. Kung mahilig ka sa putaheng kakaiba, nakakatawa, at medyo abnoy, ito na ang hinahanap mong meriendang malinamnam.

Sa koleksyong komiks na 'to, nakasalubong ng mga kikiam si Stephanie, isang itim na censor strip na tinatakpan ang mga pagmumura nila sa dati nilang komiks. Inalok ni Stephanie si Dodon na rumaket sa Japan sa pagse-censor ng hentai.

Nang magkalintik-lintik ang raket sa pagse-censor, pinili ni Dodon na maging stereotypical na egoy rapper. Samantala, si Benjo may pa-workout-workout ng abs (para mangtsiks), habang si Manny ay nag-enroll sa Visual Communication class at may nalalaman pang thesis, sa pang-uuto—este, pagmumungkahi ng bagong "kaibigan" niyang si Melissa.

Ang omnibus na ito ay nasa katakam-takam na bagong format para sa isang napakasarap na babasahin.