Rika du Plessis Omnibus 4 (Afrikaans Edition)

Let asseblief op hierdie drie boeke word ook apart op Amazon verkoop.

Lori bedank uit haar werk as lektrise by die universiteit as gevolg van onsmaaklike gebeure. Sy gaan werk by haar tante in die kwekery om vir kliënte tuine uit te lê. Haar tante stel ‘n bestuurder, Otto, vir die kwekery aan nadat haar man oorlede is. Van die begin af stel Lori ‘n ondeurdringbare buffer tussen haar en hom op, want vir dié soort onbehoorlik aantreklike mans vol charisma wat dink elke meisie moet aan hulle voete wees, het sy genoeg gehad. Dan is daar ook Len wat haar lewe kom probeer versuur…

Dit speel in die tyd van die Bolandse dorpies se aardbewing af toe selfone, TV’s en sulke luukshede nog nie daar was nie. Tussen die hartseer, kommer en trauma in die verhaal, ontwikkel ‘n mooi en teer liefde tussen twee mense wat al hul najare begin bereik het. Nie een van hulle twee het geweet hulle kan nog so vol verlange en begeerte wees nie, dat die bloed nog so bruisend soos in hul jongjare deur hulle are kan vloei nie. Maar daar is ook ‘n adder wat hulle uitmekaar wil hou, en dit wil-wil lyk of sy dalk kan slaag.

Nadat ‘n man haar onder valse voorwendsels van haar geld beroof het, is dokter Elmine se dokterspraktyk in die moeilikheid. Sy weet nie watter kant toe om ‘n bestaan te kan maak nie. Cor se vreemde huweliksaansoek blyk aanvanklik vir haar na ‘n gekkespul, maar gou besef sy sy het eintlik geen ander oplossing vir haar eie probleem nie. Nie sy of Cor wil ‘n werklike huwelik hê nie, maar hierdie reëling is vir albei ‘n middel tot ‘n doel...